Covid-19 Positive-te tana Ei leh In tur Hrisel

By Ruatpuii (Nutritionist)

He mi pheka awmte

1. Covid-19 Positive-te tana Ei leh In tur Hrisel
2. Note: 

•     BP Sang Nei Tel Tan
•     Zunthlum Nei Tel Tan

Covid-19 Positive-te tana Ei leh In tur Hrisel

1. Protein tamna ei ṭhat tur. Heng- Artui, Dal, Chana, Bete, Nutrela, Bekang chhum, Arsa, Sangha, Bawnghnute, Badam te aṭang hian ni tin chi 2/3 tal ei tum tur a ni. Covid-19 hriin taksa a tihchhiatte siam ṭhat lehnaah a pui dawn a ni.
2. Thei (bowl te 2-3 tal) ni tin ei tur a ni a, tunlaia hmuh awlsam ang ang e.g.- Lakhuihthei, Apple, Balhla, Dragon fruit etc. a ṭha vek mai.
3. Thlai (rah leh hnah) ei tam tum bawk tur a ni.
4. Sa ei tlem tur a bik takin ke pali (4)  nei sa ho.
5. Sawhthing, Aieng leh Purun var te hi natural immunity booster anni a, chaw ei apianga hmeh tel a tha.
6. Zan mut hma in bawnghnute lum pep pep ah Aieng fiante 1 mix a, in ṭhin tur a ni. Thisen sipai tih chak nan te, pum thalo leh hrawk thip tih zia awm nan te a ṭha vek.
7. Vitamin C tamna - ser, Limbu, Sunhlu - te hi a tak emaw a tui emaw ni tin tlem te te tal in ei ṭhin tur a ni.
8. Vitamin D hi taksain a mamawh zual em avangin, ni engah ni tin minute 15-20 tal taksa awmtir emaw insawizawi emaw ve ṭhin tur a ni. Dam hma nan a ṭha em em bawk.
9. Chaw ei kham veleh thingpui in loh tur a ni. Chaw ei kham aṭangin minute 30-40 tal nghah phawt tur. Thingpuia 'tannin' awm hian kan chaw eia thil ṭha - a bikin Iron, Zinc leh Calcium te - taksain hman ṭangkai a tumna kawngah a tihbuai ve theih avangin.
10. Chawhmeh ṭhing chhuan so loh chu ei loh tur a ni.
11. Readymade Thei tui leh coke lam reng reng in tam loh a ṭha.
12. Thil thak lutuk insum tur a ni, pumah thur a siam nasa a, hrawk a ti nuam lo zual bawk a, pumpui lawng leh Ulcer nei tan phei chuan a ṭha lo zual.
13. Maida lam aṭanga siam aiin Atta lam aṭanga siam ei tam a ṭha zawk a, vaimim te pawh, hengah hian fibre a tam a, chakna (energy) a pe bawk a, a hrisel.
14. Tui in tam tur a ni a, litre 2 tal in tum tur a ni. Tuilum emaw tui pangngai a in theih a, tui vawt in loh hram tur. Tuiril lakluh puitu atan Thingpui senhang te, Green tea te, Coconut tui te, Bawnghnute te, antui hang te a ṭangkai vek.

Note:

BP sang nei tel tan-

1. Chi insum tur a ni. Chawhmeh a al tawh bak chu in chhawp belh loh hram tur.
2. Soda, Papawr, Tel tam taka deep fry, bakery chhang te ei tam loh tur a ni.
3. Bawnghnute hi readymade-ah chuan a pack hring ei hram tur, a awmloh chuan a pawl, a sen hi a fat % a sang bik a, ei loh hram a ṭha.
4. Artui chu ni khatah pum khat aia tam ei loh hram tur.

Zunthlum nei tel tan-

1. Chini telna Thlum insum tur.
2. Lakhuihthei leh Balhla insum tur.
3. Vaimim, Alu, Bal, thil mawm lutuk leh Maida lam thil te insum a ṭha.
4. Atta lama siam thil te, Oats te ei a him.
5. Chaw (buh) ban deuh deuh te, chhang ban te ei loh hram tur a ni.
6. Bawnghnute hi a chunga kan ziah ang khian pack hring emaw a pawl emaw hman hram tur a ni.

    ----------XXX----------