Ei leh In leh Hriselna

Ei leh In leh Hriselna

Hriselna dan hi theih tawpin zawm zel i tum ang u. Taksaa awm kan nih tlat avangin hriselna dan kan zawm ṭhat leh zawm ṭhat loh azirin kan taksa hian a tlem atamin a rah kan seng ngei zel a ni.

Hriselna dan hre reng chung si a kan zawm ṭhat duh loh chuan, a rah kan seng a, natna kan tuar chuan ṭawngṭai vak mah ila,  Pathianin kan ṭawngṭaina chhangin thilmak hmangin a tidam chuang lo vang, tiin zawlnei chuan a lo ziak a ni.

Chuvangin tlem te te chauh a nia, tiin eiin hrisel lo chu i ei-in lo hram ang u. Eiin atana ṭha lote chu pawn lama eiin siamsa (preserved food leh ready-made food) reng reng te hi ei loh hram tum tur a ni. Hengte hi  Hmehhanna (Ajinomoto) te, rawng mawina hlo te, a tihtuina thil hrisel lo tak te, a vawn rei theihna hlo te, hmarcha hmuar tawh te, chhitui (hriak) hman tawh hnu te an lo telh ṭhin a, an chhuang ut bawk ṭhin a, chitui hman hlui tawh an hmang nawn a. Miten ei zawn hmuhna ngaihtuah ringawtin sum dawn nan an siam a. A eitute tan an ngaihtuahpui tawh chuang lo. A ei-intuten natna kan lo neihphah ṭhin a ni.

Kan hrawkkaa tui tihna chauh umin kan ei fo ṭhin a. "A chang chauhin, tlem te chauh alawm ka ei a," tiin kan ei ṭhin a. Mahse kum a lo vei tam meuh chuan taksaah heng thil ṭha lote hi a lo inkhawl khawm a, heng natna chi hrang hrang: tha na te, ruh na te, pan bawk te, hriatna thazam (nerve) leh thluak khawlohna te, thisen natna te, pumpui leh ril (digestive system) ṭhat lohna te, lung, thin, kal, hnute, chhul, ruh, tihrawl tih angah te natna mak pui pui leh Cancer te a lo awm a.
Damdawi kan lei a, kan ei leh a, doctor hnenah pawisa tam tak sengin, tha leh hun, rilru kan sengso leh ṭhin. A letin pawisa a pawi zawngin kan hmang tih kan inchhut ṭhin lo. Natna nei turin pawisain tur ṭha lo kan lei a, kan natna tihdam nan damdawi leh doctor inentir nan pawisa kan seng leh ṭhin.

 Tin, natna (hrisel lohna) hian eiin zawnna a tihnufual a, thlarau lamah pawh chak lohna leh Pathian tana rawngbawlnaah a tel tam theih loh phah a. A dam lo tan chauh pawh ni lovin, chhungte leh thiante thlengin a tul loah buaina, sum senna, tha leh rilru hahna  thlentuah kan ṭang leh bawk a. Nun hi a tinuam lo fo ṭhin.

"Tihdam Rawngbawlna," "Ei leh In atana Thurawn," tihte leh "Insumna" tih lehkhabute pawh Mizo ṭawnga lehlin-in a awmna a rei tawh a. Hriselna & Damna chanchin bu thla tin chhuak te pawh a awm a. Hengte hi i chhiar fo ṭhin ang u.

 Heng Pathian thurawn ṭha tak tak, tunlai khawvela doctor thiamte pawhin a ziak an chhiar a, an zir mup mupte hi, chhiar ṭha mang lova kan awm chuan channa nasa tak a ni ang.

Aw le, a sei leh tawh hle a, kan duh tawk leh phawt ang.
Vawiinah Lalpa nen i leng dun leh ṭheuh ang u. Hun hman nuam vek u le!