PAXLOVID: COVID-19 Damdawi Thar

PAXLOVID: COVID-19 Damdawi Thar
Dr. Patrick Thara  USA

... Kan hnung kar khan FDA chuan Pfizer siam COVID-19 damdawi mum PAXLOVID chu a tul dan a zira hman phalna (emergency use authorization) a pe ta a.

An zir chianna ah he damdawi mum hi COVID-19 positive hlimchhawna ei vat chuan a tangkai hle a ni awm e. Damdawi chi hnih inkawp a ni a, a sendang (nirmatrelvir) mum 2 leh a var (ritonavir) mum 1 ei kawp tur a ni. Vawi khatah mum 3 ei tur tihna a ni. Ni khatah vawi hnih ei tur a ni a, ni 5 chhung ei tur a ni. A vaiin mum 30 ei tur tihna a ni e.

COVID-19 positive mekte enkawlna ah immune system tih chakna damdawi tui khai chi (monoclonal antibody infusion) a chhuak tawh a, a tangkai hle a. A mum ei chi atan chuan tuna PAXLOVID hi a chhuak hmasa ber a ni. He damdawi hian kan taksa cell chhunga COVID-19 virus in thlah pung tur a dang bet a, an in hrinpun theih loh chuan kan taksa sipaiin an hneh awlsam bik a ni.

Healthcare Provider in an chawh (prescribe) tul chi a ni a, mahni tea lei theih (over the counter) a ni lovang. Hman chhuah theih turin an buatsaih mek. Kawl a eng tan mek e!