Chuap Cancer Zinga 95% - Meizûk Vang

Association on Oncologistsof North East India (AONEI) hruaitute chuan, Mizote zinga chuapcancer nei zinga 95% vel chu meizûk vang a nih thu leh, ka chhung cancer nei zinga 90% vel chu sahdah/khaini/tuibûr hmuam vang a nih thu an sawi.

Hmarchhak state-a cancer lam thiam bik, oncologist pawl hruaitute hian Inrinni khan Aizawl Press Club-ah thuthar thehdarhtute an kâwm a. AONEI Secretary, Dr Kuddush Ahmed chuan, Mizote'n tuibur an hmuam chu mak a tih thu sawiin, tuibûr chuan cancer a siam nasat thu a sawi a; cancer veite inenkawlna senso chu a sân thu sawiin, Mizoram sorkarin Zemabawka cancer damdawi-in bul a tan mekah beiseina sang tak an neih thu a sawi bawk.

AONEI Vice President, Dr Ravi Kannan, Cachar Cencer Hospital & Research Institute-a Director chuan, miin ni tin zûk leh hmuam an lei rual in, cancer an lei tel niin a sawi a, "Cancer enkawl man hi a sang lutuk. Cancer nei turin zuk lehhmuam mana sum in sêng a, cancer natna enkawl nan sum tam zawk in sên a ngai leh bawk," a ti.

AONEI hruaitute tawi-awmtu, Dr Lalbiakzuala pawhin, Mizoram atanga phaia damlo refer zingah cancer vei an tam ber thu a sawi a; hetih rual hian, zuk leh hmuam chungchanga hmalakna a that avangin, puipunna hmuna meizûk chu 20% velin a tlahniam tawh niin a sawi.

Dr Lalbiakzuala chuan, Health Minister Lalrinliana hmalaknain Mizoram Cancer Control Society din tawh a nih thu leh, Zemabawka TB Hospital ni ṭhinah cancer enkawlna tur, khum 200 awm theihna tur damdawi-in, Mizoram State Cancer Institute din mek a nih thu a sawi a; district hospital leh PHC tinah thawktute chu cancer chungchang zirtir tum a nih thu a sawi bawk.

Source:- Vanglaini