Nau Pai (Rai) Theih Hun leh Insiam leh Indang Lova Tih Dan

Thi neih ṭan nî leh a thla leha thi neih leh tur inṭan ni tur inkar lai tak vel hi nau pai (rai) theih hun (hmeichhe chi chhuah hun) a ni. Ni 28 dan te, ni 29 dan te, ni 30 dan te, ni 31 dan te hi hmeichhe thi neih inkar hlat dan a ni tlangpui a. Thi neih leh thi neih inkar lai tak (rai theih hun) chu thi neih ṭan nî aṭanga chhiar ṭana, ni 14 te, ni 15 te an ni tihna a lo ni a.

Thi i neih hnuhnun ber inṭan nî kha ni 14 emaw 15 emaw vel a nih chiah hian i rai theih hun ṭha ber a ni.

Hmeichhe chhul chhungah hian hmeichhe chi chu ni 1 a dam thei a, mipa chi chu ni 3 a dam thei. Chuvangin, rai i duh loh chuan, thi i neih hnuhnun ber inṭan ni aṭanga chhiara ni 10 aṭanga 18 inkar chu fimkhur a ngai tihna a nih chu.

Rai theih ṭan leh rai theih tawp nî chhut dan

• Rai theih ṭan = Thi neih ṭan inkar lai tak - 4
• Rai theih hun ṭha ber = Thi neih ṭan leh neih leh ṭan tur inkar lai tak
• Rai theih tawp = Thi neih ṭan inkar lai tak + 3

Tih Dan Tur

Nau pai duh loh chuan, rai theih hunahte hian hetiang hian a inven theih:

1. inpawl loh tawp,
2. condom hman,
3. a pawn lama chi tihtlak.
   

Nau pai duh chuan, hetiang hian a tih theih:

1. rai theih hun ṭha bera nupa nun hman,
   
2. condom hman loh,
3. a chhunga chi tihtlak ngei.

Chipchiar deuh zawkin han sawi leh ila:

Ni 28 dana thi nei ṭhin tan

Ni 28 dana thi nei ṭhin i nih chuan, thi i neih hnuhnun ber inṭan ni aṭanga a ni 14-na vel chu i rai theih hun a ni. Rai loh i duh chuan thi i neih hnuhnun ber inṭan ni aṭanga a ni 10-na aṭanga 17-na thlengin mipa chi chu i chhul lama a luh loh a pawimawh. Nau pai i duh chuan a ni 13-na aṭanga 15-na thleng hian ṭan lak hun a ni.

Calendar-a chhinchhiah dan tur entirna:

Sawi fiahna

• rai theih hun ṭha ✓, ṭha ber ✓✓
• chi tih luh loh hun tur  ×

Ni 30 dana thi nei ṭhin tan

Ni 30 dana thi nei ṭhin i nih chuan, thi i neih hnuhnun ber inṭan ni aṭanga a ni 15-na vel chu i rai theih hun a ni. Rai loh i duh chuan thi i neih hnuhnun ber inṭan ni aṭanga a ni 11-na aṭanga 18-na thlengin mipa chi chu i chhul lama a luh loh a pawimawh. Nau pai i duh chuan a ni 14-na aṭanga 16-na thleng hian ṭan lak hun a ni.

Calendar-a chhinchhiah dan tur entirna:

Sawi fiahna

• rai theih hun ṭha ✓, ṭha ber ✓✓
• chi tih luh loh hun tur  ×

Hriat Reng Theih Dan Tur

A chunga entirnate ang khian, Calendar-ah emaw, note book-ah emaw, thi i neih veleh chhinchhiahna siam la, nau i pai theih nîte pawh ziak nghal ang che. En fo ṭhin la, i pasal pawh chu i rai theih hun chu hrilh ve ngei ṭhin ang che.