Stroke Tenau (TIA)

 🍀🌹 STROKE TENAU (Transient ischemic attack, TIA)🌹🍀

STROKE TENAU
(Transient ischemic attack, TIA)
Transient Ischemic Attack hi TIA tiin a lam tawiin dah zel mai ila. TIA hi stroke ang tho a ni a, a lan chhuah dan pawh stroke ang tho a ni a. TIA erawh minute reilote chhung chauh a awh a, hei vang hian thluak a tichhe hman lo a ni.
TIA hi ministroke tih a ni bawk a. TIA hi stroke a thleng thei tih hriattirna, warning sign pawimawh tak a ni a, TIA nei pathum zinga pakhatin a hnu-ah stroke an nei tlangpui bawk a. TIA hi warning a nih rualin stroke thleng tur lo inven lawk theihna hun remchang a ni thei bawk ang.
TIA hi minute reilote chhung a awh a, darkar khat chhungin a reh leh vek tlangpui a. A lan chhuah dan tlangpui…
Chak lohna, kut leh ke emaw, hmai emaw hit, chawmawlh leh mu cherh churh, a bik takin taksa pangkhing khat chauhah a awm duh a.
Ţawng fiah lo, ţawng harsatna, mi dangte hriatthiam lohna.
Mit pahnih emaw, pakhat emawa khaw hmu thei lo.
Luhaina, kal emaw, din emaw ţhat theih lohna, etc.
TIA awm chhan hi ischemic stroke awm chhan nen a inang reng a. Thluaka thisen lut tur dan chah a nih vang a ni a, TIA-ah chuan a rei lo va, thluak a khawih chhe hman lo mai a ni.
Cholesterol level sang vangin thisen zâm bang chhungah bawlhhlawh a bet a, hei hian thisen zâm a tikhawng a. Bawlhhlawh, plaques, thisen khang, blood clots te’n thluak chawmtu thisen zâm a hnawh a, thisen zâm khawng vangin a fân ţha thei tawh si lo va, TIA a awm ta ţhin a. Enkawl mumal loh chuan stroke neih theihna remchang a tam tawh tihna a ni.
Thlahtute-a TIA nei te’n TIA neih ve theihna remchang an ngah a.
Kum a tamin, a bik takin kum 55 pelh hnu-ah TIA neih theihna remchang a tam a.
Hmeichhia aiin mipain TIA an nei duh zawk a.
TIA nei tawh ten neih leh theihna remchang an ngah a.
Thisen natna chi khat sickle cell disease nei teah hian thluakah thisen leh oxygen a lut tlem duh a, hei hian TIA a awmtir duh a.
Mi hang zingah thisen sang natna leh zunthlum natna nei an tam avangin TIA nei pawh an awm duh bik a.
Nunphung hrisel taka nun hian TIA awm theihna remchang a titlem thei a.
Blood pressure sang enkawl ţhat a pawimawh a.
Cholesterol sang enkawl ţhat a pawimawh a.
Cholesterol sang tihniam tura inenkawl a pawimawh a.
Lung lam natna hrang hrang enkawl ţhat a pawimawh a.
Thisen zâm natna enkawl ţhat a pawimawh a.
Zunthlum natna enkawl ţhat a pawimawh a.
Taksa rit lutuk tan intih cher a pawimawh a.
Meizial zûk loh a pawimawh a.
Taksa chettir tam leh insawizawi a pawimawh a.
Chi al leh sa thau mawm insum a pawimawh a.
Zu in loh emaw, nasa lova in emaw a pawimawh a.
Ruihhlo laka fihlim a pawimawh a.
Naupai lo tura indannna damdawi ei fimkhur a ngai bawk a ni.
Thei leh thlai hnah ei tam a pawimawh a. TIA veng thei ram hnim damdawi a awm nual bawk a, hei hi ka lehkhabu tlangzarh tumah ka dah hlawm a ni.
Aspirin hian thisen zâm chhunga thisen khang, blood clots insiam tur a veng thei a, TIA atan hman ţhin a ni.
Kan hma lawkah Krismas kan thleng dawn a, he hunpuiah hian mi tinte ei leh in lamah kan intuituah a. Thisen sang, cholesterol sang leh zunthlum natna nei tan insum a ţul hun a ni ve thung a. TIA lo nei tawh tan pawh insum a ţul hun a ni. Kan tarlan fo tawh angin, engkim hi a tawk leka tih thiam a pawimawh hle a, thil ţha tak pawh a lutuk chu thil ţha lo a chang mai ţhin a ni.

Dr. Lalkhawngaihsanga
HRISELNA, MI TIN TAN
(Gilead Thinghnai)