Cancer Lan Chhuah Dan Ṭhenkhatte
Cancer laka invenghim tur hian x-ray te leh routine test an tih hrang hrangte innghah lutuk loh a tha. Mahni taksa chu mahniin kan inhre chiang a, kan taksaa thil danglam deuh a awm chuan enfiah zung zung hi a him ber a ni. Mi mir tlangpuiin kan hriat theuh angin cancer hi hmuh chhuah hma anih chuan tam tak hi an dam leh thei a. Cancer lanchhuah dan mi tamtak ten an ngaihthah fo thin hi Dr. Mercola e-mail min rawn thawn atanga lak a ni.
- Thawchham (wheezing) leh thawk harsa: Hei hi chuap cancer vei ten an neih hmasak ber a ni thin.
- Khuh reh theilo leh awm vel na them thum: Cancer thenkhat, thisen cancer, (leukemia) an tih leh chuapa bawk awm te hian heng symtoms hi an nei duh khawp mai. Chuap cancer vei thenkhatte hian an awm vel a na tana an koki leh ban lam tai darh hi an sawi chawk a ni.
- Khawsik zeuh zeuh thin leh infection awm thin: Hei hi thisen cancer leukemia an tih hi a ni duh khawp. Leukemia hian kan thlingah white blood cells thalo (abnormal) a rawn siam tir a, tichuan, kan taksa natna vengtute white blood cells kha an tlem ta a, chu chuan infection kan lo nei ta fo thin.
- Thil lem harsa (difficulty swallowing): Thil lem that theihlohna hi chaw kawng, (esophageal) emaw hrawk cancer emaw lan chhuah dan tlangpui a ni deuh bera. Chuap cancer vei te pawh hian thil lem harsatna a awm ve thei bawk.
- Lymph nodes vung: Nghawngah emaw thalah emaw zakhnuaihah vung a awm thei. (lymph nodes hi be kan ti em ni aw) Hetianga bawk thar a lo awm hian lymphatic systemah thil diklo a awm tihna a ni a, cancer a ni duh chawk.
- Pem hleka thisen chhuak tawp harsa leh kan vun, hmun hrang hrang thil duk (bruises) awlsam taka awm thin: Hei hi leukemia vei sign a ni duh viau. A chhan chu leukemia cancer cells khan, kan red blood cells oxygen petu leh kan platelets thisen chhuak tam tur vengtute kha an nek chepa, an thawh tur ang an thawk thei ta lo thin a ni.
- Chaklo leh hah ngawih ngawiha in hriatna: Hei hi cancer chi hrang hrang lan chhuahna a ni duh hle. Englai pawha chau ngawih ngawiha inhriatna leh hahchawlh leh tamtawk mithilh pawha reh chuang lo anih chuan daktawr hnena in entir thuai a tha ang.
- Pum puar (bloating of abdomen) leh buk rih lam pung thut: Hei hi hmeichhiate tan chibawm (ovarian) cancer a ni duh hle. Pum a lo lian thut thei (bloating) a reh leh mai thei bawk. Heting hian hun rei tak chhung a awm thei a ni.
- Chaw chaklohna leh puar deuh renga inhriatna: Hei hi hmeichhe tan bik, chibawm (ovarian) cancer awm tanna a ni duh hle a ni. Darkar tam fe chaw an ei tawh loh pawhin chaw chakna an nei lo tlat thin.
- Tai (pelvis) leh pum na: Chibawm cancer nei tan hetiang hi a awm duh hle a ni.
- Ek thi leh tai thi (rectal bleeding): Hei hi rilpui leh tai (colorectal cancer) cancer a ni fo thin.
- Chhan awm lem lova taksa rih zawng lo zang : Hei hi rilpui emaw chaw kawng cancer a ni duh viau.
- Pum nuamlo leh pumna fo: Rilpui emaw pumpui cancer hian pumna leh pum nuamlo a siam chawk a ni.
- Hnute a sen emaw, pan emaw, vung awm: Hei hi inflammatory breast cancer a ni thei. Hnutea hetiang a awm chuan daktawr hriattir vat a tha.
- Hnute hmur awm dan a danglam chuan: Hnute hmur landan danglam hi hmeichhia ten hnute cancer an vei tih daktawr ten an hmuhchhuah hma daihin a awm thin. An hnute hmur hi a tlum (flattened) emaw, a sir zawng a hawi emaw, van kawk zawngin a hawi thei bawk.
- Hmeichhia ten thi an neih laia na leh thi chhuak tam chungchuang bik emaw, thi neih inkara thi chhuak thin: Hetiang hi chhul cancer lo intan a ni duh hle. Hetianga thil danglam tak a lo awm chuan in en fiah a tul hle ang.
- Hmai vung (Puffiness): Chuap cancer nei hian hmai bui deuh emaw vung an nei chawk. Tin hmai hi a lo sen deuh vut thei bawk. A chhan chu chuap bawk (tumor) te tak te te khan kan awm chhunga (chest) thisen luang tur kha a lo hnawh thei a, thisen kha hmaiah leh nghawng velah khan a dang tawt thei a ni.
- Pan dam theilo emaw, vuna chhah bik awm, tin a lo khirin a lo thi thei: Hei hi a awm chuan vun cancer lo intanna a ni duh hle.
- Chhan awm lova tin (nails) awmdan inthlakthleng: Tin hnuaia dum emaw buang emaw leh lo inchhu bial (dot) a awm chuan vun cancer a ni duh. Tin hmawr lo kawm (clubbing) deuh a awm chuan chuap cancer a ni duh hle. Tin a lo dang em em a, a lo var deuh puap chuan thin cancer a ni duh hle bawk a ni.
- Kawng na emaw nak dinglam hnuai deuha na: Thin cancer hian hetianga na hi a nei chawk. Tin, hnute cancer vei pawh hian kawng na hi chu an nei ve fo bawk.
(Lalmuankima - Health Care Centre: Mizoram fb group)
or
https://hriangtlang.blogspot.com/2014/10/cancer-lanchhuah-dan.html
No comments:
Post a Comment