MIPA CANCER VEI TAMNA BER MIZORAM

MIPA CANCER VEI TAMNA BER MIZORAM

___________________
24-05-2016
TheAizawlPost::::

Cancer data thar ber tirhchhuahah Aizawl chu mipa cancer vei tamna ber niin Papumpare, Arunachal Pradesh chu hmeichhe cancer tamna ber a ni thung. Northeastern States chu a tlangpuiin cancer vei tamna sa tih hriat a nih tho rualin data thar bera a landan ang chuan khawvelah pawh cancer vei tamna berte zinga mi an ni ta a ni.

'Tobacco hluar lutuk chu North-east a cancer tam chhan a ni. North eastern state hi khawvel huap pawha cancer vei tamna ber an ni ta. Pumpui cancer chungchangah hian Chennai hi pumpui cancer vei tamna ber anga kan hriat thin a ni a, chu chu Aizawl kan chhinchhiah ve loh hma a ni a. Aizawl kan chhinchhiah ve tak chinah Chennai let 10 in pumpui cancer vei an tam zawk' tiin Dr G.K. Rath, chief of the Nantional Cancer Institute chuan a sawi.

Lung cancer hi mipa ah a hluar hle a, hmeichhe lamah hnute cancer a hluar chho zel niin tarlan a ni bawk. Kum 2016 thlengin cancer vei 14.5 lakhs awm tawhin kum 2020 ah chuan 17.3 lakhs vel a nih rin a ni a. Cancer vanga thi chu 7.36 lakhs awm tawhin kum 2020 ah chuan 8.8 lakhs a kai rin a ni bawk.

Heng data te hi Indian Council of Medical Research (ICMR) te tihchhuah niin Population-Based Cancer Registry (PBCR) programme atanga an lakhawm a ni.

'He data hmang hian ruahmanna leh health care services tha zawk kan siam theih phah dawn a. North east a cancer hluar lutuk pawh hi nasa zawka State a inrawlh nan hma kan la dawn a ni' tiin Dr. Soumya Swaminatham, Director-general, ICMR chuan a sawi.

Cancer hluar deuh sawiin - pumpui 7.6 per cent, prostate 7 per cent, oesophagus 6 per cent leh brain 5 per cent te mipa lamah a ni a. Hmeichhe lamah chuan hnute cancer 27.5 per cent, cervix uteri 12.3 per cent, ovary 5.3 per cent, thyroid 4 per cent leh mouth 3.9 per cent te a ni.

Hei bakah hian mipa lamah colon cancer leh hmeichhe lamah cervix uteri cancer chu a hluar tih hriat bawk a ni a. Hmeichhia ten meizuk an uar tak em avangin lung cancer a hluar chho, tiin Dr. Rath chuan a sawi bawk.