Thawkna Dawt Natna (Bronchitis)

BRONCHITIS

(Âwmna pui)

By: Jordan Hmar Zote

Bronchitis Chungchang

Natna hrik chi khat, virus an tihin kan chuap aṭanga kan thâwkna dâwt chhung lam an tih hliam/lawng nasat avangin he âwmna pui hi a lo awm thei a, hei hi Acute Bronchitis an ti. He virus hi hritlang siamtu leh influenza siamtu hrik a ni. Antibiotic hmanin awmzia a nei lo.

Bronchitis lan chhuah dan

Khuh deuh reng, khâk tam, khâk fim var, a ṭhenah chuan a eng deuh emaw, a hring deuh emaw, a buang deuhin emaw a pawlh. A nasa deuhah chuan thisenin a pawlh (khak thi).
An thaw a hah, an thaw a chham awl, an thawk a tawi, khawsik ser ser, a ṭhen chu an tlun hial thei.
Awm bâwr vel nâ emaw, khat deuh ul anga awm, awm tâwt. Hei hi acute bronchitis awm dan a ni tlangpui.

Bronchitis Vei Awlte

Meizial zu nasa ho te, meizial zu mi bula awm tam te, kum upa lam te, nausen te, naupang lamah te, thil me, hnim/hlo me leh buh si etc, khawih nasa ho te, hnawmhnawk hal khu hip nasa te, chawkawng lam ulcer nei nasa ho te, hlo kah na tur, balhla ûmna tur atana  carbide hman chîng ho te, workshop a thawk te, tuibur leh sahdah hmuam nasa ho te, heng thosi hnawh darhna atana hman kan thil hal ṭhin te, insect killer hmang nasa ho zingah a rim hip lut nasa ho te, thlai rannung thahna hlo khawih nasa ho te hian he natna hi an nei awlsam bik em em a ni. Damdawi hmanga thlai kan sawngbawl nasat te hi a va ṭha lo tak em.

Natna Awm Chhoh Dan

1. Meizial zu mi te, boruak khu leh bawlhhlawh leh chenna hmun vela bawlhhlawh hal khu hip hnem ten awmna pui benvawn (Chronic Bronchitis) an nei duh bawk.
2. Chronic Bronchitis hi a lo benvawn tawh chuan thaw hah natna (chronic obstructive pulmonary disease (COPD),  ASTHMA)  ang te an lo nei zui ta ṭhin a ni.
3. Miin vawi khat bronchitis a neih a, he natna siam thei ho hi a pumpelh chuan, he thaw hah natna hi a lo pumpelh thei dawn a ni.

Ngun takin ngaihtuah teh u

• Hlawk lutuk kan tum vanga damdawi leh a behbawm kan hman nasat hian, a sawngbawltu lakah natna a siam thei a, a lo eitu pawhin a tuar bawk.
• Rinawmna, taimakna a pawimawhzia hre thar leh ang u.
• Kan inti fing em em a, mi zingah thil hre ber nih kan tum a, kan ṭawng zuap zuap a, kan tana pawi tur leh ṭha lo tur hi kan ngaihtuah leh mang si lo.
• Damdawi (chemical) hi vawi-leh-khat-ah a effect a lang nghal lo a tam ber an ni.
  

Hetianga i awm chuan inentir vat tur

1. I khuh reng a, i khak a lo tam em emin,
2. I khua a sik a, i tlun bawk chuan,
3. I khawsik a reh loh bawk chuan,
4. I awm bâwr vel, naupangah pawh, thâwk zawnga ri ṭet ṭet a awm chuan.

Doctor-ten an Hriat Chhuah Dan

1. âwm ngaihthlak hmangin
2. x-ray hmangin
3. khak exam hmangin
4. etc.
   

Heng hmang hian doctor chuan i natna a lo hre thei dawn a, i damdawi tur a lo hre thei  bawk ang.

Inkai Chhawn Theih Dan

1. Khuh leh hahchhiau, kut bal aṭangin,
2. In fawh (kissing)  leh ei leh inna thleng leh no fai lo aṭangin,
3. In chibai, inkuah aṭangin.

Fimkhur Dan Tur

1. I fate leh nangmah pawh kut silfai ngun a pawimawh,
2. Meizial zu mi te zingah leh mipui pun khawm tamnaah awm tlem rawh.
3. Thil rim nâ, khu, mé khawih dawn leh mipui tamnaa i awmin hnar leh hmai khuh ṭhin rawh.
4. Mi zingah mei zu khu luih luih suh.
5. Naute i lawmin fawp kher suh, thâwk khum huam huam lo bawk la.

GILEAD THINGHNAI