Mizoramah Japanese Encephalitis (JE) Natna

Mizoram-a Japanese Encephalitis (J.E.) vei hmasa ber Serchhip District mi hmuhchhuah a ni.

By Zonuna Kawlni (LENKAWL) - July 21, 2022

Thosi seh aṭanga kai theih Japanese Encephalitis vei chu tunhnai khan Mizoram-ah a vawi khatna atan hmuh niin amah hi Serchhip District chhunga Thenzawl khaw mi nia thudawn a ni a, Thenzawl-ah hian he natna chungchang inzirtirna leh hri kai dang an awm leh awm loh zawnchhuahna pawh neih thuai tura ruahman a ni.

Serchhip CMO Office atanga thu kan dawn danin Thenzawl khuaa damlo mipa pakhat, kum 68 mi chu tunhnai khan damlohna avangin Aizawl-a Private damdawi In pakhat ah enkawl niin a dinhmun enin Thosi (Culex) seh atanga inkaichhawn theih, Japanese Encephalitis nia rinhlelh a nih avangin tun thla ni 14 khan a Sample (Serum leh CSF) chu Kolkata-ah enfiah tura thawn a ni a, tun thla ni 18 khan result chhuakin Japanese Encephalitis a kai tih hmuhchhuah niin Mizoram-a he hri kai hmasa finfiah hmasak ber nia hriat a ni a, tunah hian sawrkar chuan ruahmanna siamin an enkawl mek nia thu dawn a ni bawk. Health Department aṭanga kan thu dawn chuan he dam lo hian tun thla tir lam aṭang khan insawiselna a nei tih an sawi a, tunah hian amah enkawl mekna, Private damdawi In-ah hian enkawl mek a nih thu leh a dinhmun en fiah reng a nih thu an sawi.

Serchhip-a Health Department hotute chuan he hri kai hmuh chungchangah hian Thenzawl CHC-a Medical Officer leh thawktute chu he natna chungchang mipuite inzirtirna nei tur leh Thosi tirem tura hma la tura thurawn an pek thu sawiin, he hri kai zawn chhuah a nih theihna turin JE Test Kit te pawh thuneitute hnenah an dil tawh thu an sawi a. Tun ṭuma hri kai hmuhchhuah hi Serchhip District mi ni mah se, an hmuhchhuahna hi Aizawl lam a nih avangin Aizawl District lamin report an khawih thu sawiin, he natna hi Malaria thehdarh theitu Thosi ten an thehdarh loh thu leh Thosi chi khat, Culex an tih, JE virus pai te chauhin an thehdarh theih thu an sawi a, Thosi laka invenna- Thosilen zar that te, ram kal ten kawr ban tluan leh kekawr tluan hak, Thosi hlo chhit te, tui tlin theihna In leh bul vel te tihfai that te lo uar lehzual turin an chah a ni.

Thenzawl CHC-a Medical Officer chuan he natna kai chungchangah hian thuneitu sangte thu an ngaihchan mek thu leh Vawiin lam hian thu thar a awm an beisei thu a sawi a, mipuite tan lo chi-aina tur a awm loh thu a sawi bawk.

A Theh Darhtu

Japanese Encephalitis (J.E) hi Mizoramin kan la hmelhriat loh leh kan rama la awm ngai lo natna niin, Thosi chikhat ‘Culex thosi’-in a theh darh deuh ber a. Thosi leh kan ranvulh thenkhat zinga mi Vawk inkara inkaichhawn ni deuh berin, Vawk bakah hian heng ran dang - Bawng, Lawi (cattle), Ar (poultry) te hian an kai thei a, heng Thosi te hian mihring an seh chuan mihring in he natna an kai chhawng ve leh thei a ni.

A Lan Chhuah Dan

He natna lan chhuah dan tlangpui chu Khawsik sang taka inṭanin, Kaih, Rilru lam buaina te leh awm hle hle theih lohna te leh hriatna tibuai zawngtein a lang chhuak ṭhin a ni.

He natna ve mi 4-a 1-in an thihpui.